Ikipe y’Ingabo z’u Rwanda ya Basketball, APR BBC, yatangaje ko yasinyishije Umunyamali, Aliou Diarra, amasezerano y’Umwaka.
Uyu mukinnyi w’Imyaka 22 gusa y’Amavuko, yamukiye mu Ikipe ya FUS Rabat yo muri Maroke.
Muri FUS Rabat, Diarra yayikiniye imikino ya Basketball Africa League (BAL) y’uyu Mwaka w’i 2024.
Mbere yo kwerekeza i Rabat, Diarra yakiniye Ikipe ya Stade Malien yo muri Mali, ari nayo yazamukiyemo.
Mu Myaka ibiri yakiniye FUS Rabat mu mikino ya BAL, n’umwe mu bakinnyi bagiye bagaragaza ko Ubwugarizi bwabo butavogerwa.
By’umwihariko, muri uyu Mwaka w’i 2024, yongeye gutoranywa ku nshuro ya kabiri, mu ikipe y’abakinnyi 5 bahize abandi muri BAL ndetse n’iy’abakinnyi bahize abandi kugarira.
Ibindi birungo byatumye APR BBC imushima, n’uko guhera mu Mwaka ushize w’i 2023, Diarra n’umukinnyi w’Ikipe y’Igihugu ya Mali.
Biteganyijwe ko azaseruka mu Mwambaro wa APR BBC tariki ya 21 Nyakanga 2024, ubwo iyi Kipe izaba yesurana na Espoir BBC mu mukino wa Shampiyona.
Kugeza ubu, mu rugamba rwo guhatanira Igikombe cya Shampiyona, APR BBC iri ku mwanya wa kabiri n’amanota 27, ikesha gutsinda imikino 13 muri 14 imaze gukina, ikaba igwa mu ntege Ikipe ya Patriots BBC.
