Kuri iki Cyumweru i Dar es Salaam mu gihugu cya Tanzania, hakinirwaga umunsi wa kabiri w’imikino yo gushaka itike y’igikombe cy’Afurika mu makipe agize akarere ka 5 ka Basketball muri Afurika.
Ni umunsi waranzwe n’intsinzi y’u Rwanda imbere ya Eritrea, mu gihe Uburundi nabwo bwisengereye Sudani y’Epfo.
Iyi mikino iri kubera mu gihugu cya Tanzaniya mu Nzu y’imikino yitiriwe Nyakwigendera Benjamin Mukapa wayoboye iki gihugu.
Mu mukino wahuje u Rwanda na Eritrea, warangiye ku ntsinzi y’amanota 114 y’u Rwanda kuri 34 ya Eritrea, mu gihe Uburundi bwatsinze Sudani y’Epfo amanota 57-42.
Muri uyu mukino, Ntore Habimana wo ku ruhande rw’u Rwanda yerekanye urwego ruri hejuru, ibi bikaba byagaraganwe n’amanota 18 yatsinze muri uyu mukino.
Banyotewe n’itsinzi yari imaze iminsi yarabaye ingume, abasore b’Umutoza Cheikh Sarr bitwaye neza mu duce tubiri tubanza tw’umukino, kuko badutsinzemo amanota 23-07 na 27-07, ibi bikaba byatumye amakipe yombi ajya kuruhuka ku ntsinzi y’amanota 50 kuri 14.
Igice cya kabiri cy’uyu mukino, cyatangiye abakinnyi barimo Ntore Habimana, Kendall Gray na Robeyns William babona neza mu kibuga, ibi bikaba byafashije u Rwanda kwegukana agace ka gatatu ku manota 35 kuri 15, mu gihe agace ka kana ari nako ka nyuma k’umukino, karangiye u Rwanda rufite amanota 29 kuri 05.
Uretse Ntore Habimana watsinze amanota 18, William Robeyns yatsinze amanota 17 mu gihe Kendall Lamar Gray yatsinzemo 16.
Nyuma y’uyu mukino, kuri uyu wa mbere u Rwanda ruragaruka mu kibuga mu mukino ruza guhuramo na Sudani y’Epfo guhera saa 18:00 ku isaha ya Kigali.
Mu gihe umukino wa gatatu ruzawukina n’Uburundi ku wa Gatatu tariki ya 21 Kamena 2023.
Iyi mikino y’Akarere ka 5, izatanga ikipe imwe gusa izahagararira mu mikino ya nyuma y’Igikombe cy’Afurika kizabera mri Angola guhera tariki ya 07 kugeza ku ya 16 Nyakanga 2023.
Iyi mikino izabera muri Angola izaba ihuza amakipe y’Ibihugu 12 yahize ayandi muri Zone zitandukanye, mu gihe DR-Congo izaba irwana no kurinda Igikombe yegukanye mu 2019 ubwo iyi mikino iheruka gukinwa.
