Ikipe ya Patriots BBC yaraye itsinze iy’Ingabo z’Igihugu (APR BBC), amanora 77 kuri 70, ishimangira kuyobora urutonde rwa Shampiyona mbere y’uko hatangira imikino ya kamarampaka.
Uyu mukino waraye ukiniwe muri BK-Arena, wari wahuruje imbaga cyane ko Patriots yagiye kuwukina itaratsindwa umukino n’umwe mu gihe APR yari yaratsinzwe umwe.
Muri uyu mukino, William Perry yafashije Patriots kwikura imbere ya APR. Uyu mukinnyi yagoye iyi kipe y’Ingabo z’u Rwanda, binyuze mu mipira itanga amanota yahaye bagenzi ndetse no kuyobora umukino.
Uyu mu mukino wafatwaga na benshi nk’umukino w’igikombe, agace ka mbere kawo karangiye amkipe yombi anganya amanota 20-20.
Agace ka kabiri kawo, kegukanywe na APR BBC n’amanota 19 kuri 16 ya Patriots BBC.
Nyuma y’uko amakipe yombi avuye ku kiruhuko cy’iminota 15, Patriots BBC yagarutse yahinduye uburyo bw’imikinire, ubu bwanayifashije kwegukana agace ka gatatu n’amanota 19-14, ndetse n’aka kane yatsinze ku manota 25-17.
Ku ruhande rwa Patriots, uretse Perry witwaye neza, Stephaun Branch yazonze APR BBC ayibonamo amanota 25 mu gihe wari n’umukino we wa mbere yari akinnye.
Uretse aba bakinnyi babiri, kapiteni w’iyi kipe, Dieudonné Ndizeye yatsinze amanota 12.
Ku ruhande rwa APR BBC, Isaiah Miller niwe wayitsindiye amanota menshi (25) anatanga imipira 3 yabyaye amanota.
Muri iyi kipe kandi, Notre Habimana yatsinze amanota 12 mu gihe Aliou Diarra yatsinze 11.
Mu kiganiro kihariye yahaye THEUPDATE nyuma y’umukino, Umutoza wa Patriots BBC, Henry Mwinuka yagize ati:“Iyi ntsinzi igiye gufasha abakinnyi bange kwitegura imikino ya kamarampaka. Kugeza ubu nta mukino turatsindwa muri Shampiyona, kandi niyo ntego yacu kugeza irangiye”.
Yakomeje agira ati:“Wari umukino utari woroshye, kuko twawufataga nk’umukino w’igikombe. Ndashimira abakinnyi bange bagumye mu mukino nyuma yo gutsindwa agace ka kabiri, ariko bakitwara neza mu tundi duce dusigaye”.
“Tugiye kwitegura umukino wa REG BBC na UGB BBC, kandi nayo intego n’ukuyitsinda, ubundi tukazisobanura na Kepler BBC mu mikino ya kamarampaka, izerekana ikipe izatwara igikombe cya Shampiyona y’Umwaka w’i 2024”.
Amafoto
