Ikipe ya Patriots BBC yaraye itsinzi iya APR BBC amanota 61 kuri 49 mu mukino wa kane (4) wa kamarampaka [Play-Offs] waraye ukiniwe mu nzu y’imikino n’imyidagaduro izwi nka BK-Arena.
Uyu mukino wari uhanzwe amaso n’abatari bacye, wakinwe APR BBC isabwa kuwutsinda ikiyongerera amahirwe yo kwegukana igikombe cya shampiyona ku kigero cya 80%, mu gihe Patriots BBC kuwutsindwa byari bivuze ko ikuyeyo amaso, kuko kuzatsinda imikino 3 yari bube isigaye, rwari urugamba rutoroshye.
Nk’uko aribyo yasabwaga, Patriots BBC yatangiye umukino neza, gusa APR BBC ntabwo yayoroheye, kuko agace ka mbere k’uyu mukino ndetse n’umukino wose muri rusange, byaranzwe no gucungana ku jisho, ibi byanatumye amanota arumba ugereranyije n’indi mikino itatu yari yabanje.
Muri uku kwigengesera ku mpande zombi, agace ka mbere k’uyu mukino karangiye ari amanota 14-14, mu gihe impande zombi zagiye mu kirihuko cy’igice cya mbere, Patriots BBC iyoboye umukino n’amanota 24-20.
Agace ka gatatu katangiye Patriots BBC yasabwaga gukora ibirenze ifite imbaraga nyinshi ndetse igasoza ikegukanye n’amanota 48-40, mu gihe umukino muri rusange warangiye Patriots BBC iwegukanye ku ntsinzi y’amanota 61-49.
Iyi ntsinzi yatumye amakipe yombi anganya imikino 2-2, mu gihe hasigaye imikino 3 muri 7 bagomba gukina.
Bivuze ko muri iyi mikino 3, ikipe izatanga indi gutsinda 2 izahita itwara igikombe cya Shampiyona y’i 2024, ianakatishe itike yo gusohokera u Rwanda mu mikino ya Basketball Africa League (BAL) y’Umwaka utaha w’i 2025.
Kuri uyu wa gatanu, amakipe yombi aragaruka mu kibuga mu mukino wa 5, mu gihe ku cyumweru hazakinwa umukino wa 6.
Muri iyi mikino 2 iri mu mpera z’iki Cyumweru, ikipe izayegukana yombi izahita itwara igikombe, mu gihe zayigabana, igikombe cyazatwarwa mu Cyumweru gitaha.
Iki gikombe kiri gukinirwa, kibitswe n’ikipe ya APR BBC, mu gihe Patriots BBC igiheruka mu Mwaka w’i 2020.
Muri uyu mikino, Stephaun Branch w’ikipe ya Patriots BBC niwe wawitwayemo neza, awutsindamo amanota 16, akora Rebounds 14, anatanga imipira 5.
Amafoto
