Umunyamerika Cleveland Thomas Jr yagarutse mu Ikipe y’Ikigo cy’Igihugu gishinzwe Ingufu (REG), REG Basketball Club, azanywe no kuyikinira mu Mikino isigaye yo kwishyura ya Shampiyona.
Uyu mugabo w’Imyaka 30 y’Amavuko, yagiriye ibihe byiza muri iyi kipe mbere yo kuyivamo, cyane mu mikino ya Basketball Africa League (BAL), yo mu 2022 n’iyo mu 2023.
Uruhare rwe muri iyi mikino, rwafashije REG BBC kugera mu mikino ya 1/4 gusa ntabwo yigeze iharenga.
Iyi mikino yakinirwaga mu Rwanda, ariko inshuro 2 zose yayikinye yavagamo rugikubita, mu gihe mu majonjora yabaga ityaye.
Amakuru THEUPDATE ifite, n’uko uyu mukinnyi yageze mu Rwanda kuri iki Cyumweru, azanywe no kurangizanya n’iyi Kipe.
Thomas asanze REG BBC iri ku mwanya wa gatatu ku rutonde rw’agateganyo rwa Shampiyona, n’amanota 21.
Aya manota iyakesha gutsinda imikino 9 mu mikino 12 imaze gukina.
REG BBC izagaruka mu kibuga tariki ya 28 Kamena 2024, mu mukino uzayihuza n’Ikipe ya Kigali Titans BBC.
Thomas yageze muri REG BBC ku nshuro ya mbere muri Werurwe y’Umwaka w’i 2022.
REG BBC yamuzanye ngo ayifashe mu mikino ya BAL, ndetse anabigaragaza tariki ya 06 uko Kwezi, ayitsindira amanota 26 mu mikino yatsinzemo AS Salé.
Muri uwo Mwaka kandi, yanayifashije kwegukana Igikombe cya Shampiyona y’u Rwanda.
Mu Kwezi k’Ukwakira uwo Mwaka, Thomas yateye Umugongo REG BBC, yerekeza mu Ikipe ya Al-Ahli Benghazi.
Nyuma, yerekeje mu Ikipe zirimo Beirut Club n’iya Dorados de Chihuahua yo muri Mexique yagiyemo muri Nyakanga y’i 2023.