Abantu barindwi (7) barimo babiri (2) barembye cyane, bakomerekeye mu Mpanuka y’Imodoka yabereye muri Gare ya Nyabugogo.
Iyi Mpanuka yabereye muri iyi Gare mpuzamahanga iherereye mu Mujyi wa Kigali mu Karere ka Nyarugenge, yabaye ku masaha ya saa Saba n’Igice (13:30) zo kuri uyu wa Kane tariki ya 17 Kanama 2023.
Yabaye nyuma y’uko Imodoka yo mu Bwoko buzwi nka Yutong, yakataga aho Imodoka zijya mu Ntara zisohokera, yananiraga uwari uyitwaye, ikagonga abagabo batandatu (6) n’umugore umwe (1).
Muri aba bagonzwe, umugabo umwe (1) n’umugore umwe (1) bakaba barembye, mu gihe abandi bakomeretse bidakanganye.
Iyi Modoka yari ifite Plaque (ikiyiranga) RAF 529J yo muri Kampani itwara abagenzi mu Mujyi wa Kigali izwi nka Royal.
Ubwo yageraga muri iyi Gare, THEUPDATE yasanze abari aho bacitse ururondogoro, gusa umwe mu bakozi bakorera MTN yabashije kuducira ku mayange icyateye iyi Mpanuka.
Mu magambo ye yagize ati:”Aho twari duhagaze, twabonye hasenyuka, Shoferi ahagarika Imodoka hafi yacu, ajya mu Bwiherero. Amaze kugenda, Imodoka yamanutse itarimo uyitwaye (Shoferi), igonga abazamukaga bava muri Gare ndetse n’abacuruza Me2U bari bicaye hafi aho. Yari Impanuka iteye ubwoba kuko hari n’abakuwe mu Mapine y’iyi Modoka nyuma yo kubakandagira”.
Yakomeje agira ati:”Biragoye ko kwemeza ko bamwe mu bagizweho ingaruka y’iyi Mpanuka babaho, kuko umugabo umwe n’umugore umwe, batwawe barembye cyane”.
“Ku ruhande rwange, navuga ko Shoferi w’iyi Modoka yagize uburangare. Iyo afunga Imodoka neza ntago yari kwitwara ngo igonge abantu. Iyo hataba Moto ngo iyikumire, yari bukore ibara kuko hafi y’aho Moto yari iri hari abantu batari bacye badoda Inkweto”.
Iyi Moto yabereye benshi igitambo, yasanzwe idafite ikirango (Plaque), mu gihe uwari uyitwaye yatwawe kwa muganga.
Abandi bari aho iyi Mpanuka yabereye baganiriye na THEUPDATE, batangaje ko yabaye itunguranye, ku buryo n’ababashije kuyicika habaye ah’Imana.
Iyi Mpanuka ikimara kuba, abakomeretse bajyanywe kwa muganga guhabwa ubutabazi, mu gihe urwego rwa Polisi Ishami ryo mu Muhanda rwari rugikora iperereza ubwo THEUPDATE yatunganyaga iyi nkuru.
Iyi Mpanuka ibaye hadashize amasaha 12 habaye indi yabereye mu Karere ka Kamonyi ahazwi nka Rugobagoba.
Iyi ikaba yarakomereyemo abari batwawe mu Modoka yo mu Bwoko bwa Bisi izwi nka Capital.
N’ubwo urwego rushinzwe Umutekano wo mu Muhanda ruhora rukangurira Abashoferi kuba Maso, hakwiye gufatwa izindi ngamba zikomeye mu rwego rwo gukumira izi Mpanuka za hato na hato.
Amafoto
