U Rwanda na Maroke byatangajwe nk’Ibihugu bizakira ku nshuro ya mbere imikino ya Conference ya Basketball Africa League (BAL).
Imikino ya Conference yiswe Nile, izakinirwa i Kigali mu Rwanda, hagati ya tariki ya 17 n’iya 25 Gicurasi 2025. Izakinirwa muri BK Arena.
Byatangajwe kuri uyu wa Kane tariki ya 21 Ugushyingo 2024, ubwo ubuyobozi bwa Basketball Africa League (BAL) bwashyiraga hanze ingengabihe y’uko iyi mikino izakinwa.
Imikino izabera mu Maroke iteganyijwe gutangira tariki ya 05 Mata 2025, ikaba izakinirwa muri Prince Moulay Abdellah Sports Complex i Rabat, mu gihe iya nyuma izakinwa muri SunBet Arena i Pretoria muri Afurika y’Epfo.
Ni ku nshuro ya mbere imikino ya Conference igiye gukinirwa muri Maroke, n’iya mbere iya nyuma igiye gukinirwa hanze y’u Rwanda, kuva iyi mikino yatangira mu 2021.
Guhera mu 2021 iyi mikino yatangira, u Rwanda rwakiriye imikino ya nyuma, inshuro enye (4) zikurikiranyije.
Imikino ya BAL yo mu 2025, izahuza amakipe 12 avuye mu bihugu 12 muri Afurika. Bivuze ko buri gihugu kizavamo Ikipe imwe.
Biteganyijwe ko hazakinwa imikino yose 48, ikazakinirwa i Rabat muri Maroke, i Dakar muri Senegal, i Kigali mu Rwanda na Pretoria muri Afurika y’Epfo.
Aya makipe 12 azagabanywe muri Conference (Ibyerekezo) 3, buri imwe igizwe n’amakipe 4.
Muri buri Conference hazakinwa imikino 12, aho buri kimwe izakina na ngenzi yayo imikino 2.
Imikino ya Conference yiswe Kalahari, iteganyijwe gukinwa hagati ya tariki ya 05 n’iya 13 Mata 2025, ikaba izakinirwa i Rabat muri Maroke.
Imikino ya Conference yiswe Sahara, izakinirwa i Dakar muri Senegal hagati ya tariki ya 26 Mata n’iya 04 Gicurasi 2025.
Amakipe 8 azaba yarahize ayandi muri ibi byerekezo uko ari bitatu, azahita akatisha itike yerekeza i Pretoria mu mikino ya nyuma, iteganyijwe gukinwa hagati ya tariki ya 06 n’iya 14 Kamena 2025.
Muri uyu Mwaka, amakipe 7 yegukanye ibikombe bya Shampiyona mu bihugu birimo; Angola, Egypt, Morocco,
Nigeria, Rwanda, Senegal na Tunisia, afite itike yo gukina Conference, atanyuze mu majonjora y’ibanze.
Andi makipe 5, azabona itike anyuze mu kuyihatanira, mu mikino y’amajonjora yatangiye mu Kwezi k’Ukwakira kugeza mu Kuboza muri uyu Mwaka w’i 2024.
Ku ruhande rw’u Rwanda, Ikipe y’Ingabo z’Igihugu, APR Basketball Club niyo izahagararira Igihugu, nyuma yo kwegukana igikombe cya Shampiyona itsinze Patriots BBC imikino 4-2.