Umukinnyi umwe rukumbi w’Umunyarwanda niwe washoboye kujya kuri Podium itangirwaho Imidali y’abakinnyi bahize abandi muri Marato mpuzamahanga yo gusiganwa ku Maguru ya Kigali yitiriwe Amahoro, yakinwaga ku nshuro yayo ya 18.
Iki gihembo rukumbi u Rwanda rwegukanye, ni icyahawe Yankurije Marthe wegukanye umwanya wa Karindwi mu ntera ya 1/2 cya Marato (Half Marathon), akoresheje isaha, iminota 15 n’amasegonda 40.
Abikesheje uyu mwanya yasorejeho, Yankurije Marthe yahembwe Sheke y’Amadorali 500 ya Amerika (500$).
Iyi Marato yihariwe n’Abanyakenya kuko mu bihembo 32 byayitanzwemo, abakinnyi b’Abanyakenya begukanyemo 28, Ethipia itwaramo 3, u Rwanda rwegukana kimwe.
Yakinwe mu byiciro bitatu (3), birimo Full Marathon ireshya n’intera ka Kilometero 42,1; Half-Marathon y’Ibilometero 21,09 na Run for Peace cyangwa Run for Fun yitabirwa n’abasiganwa bisanzwe basiganwa Intera y’Ibilometero 10.
Abasiganwa basaga ku 8,500 baturutse mu bihugu 48 ku Migabane itandukanye y’Isi ni bo biyandikishije mu isiganwa ritari risanzwe nyuma yo kuzamurirwa urwego rw’Amafaranga aritangwamo.
Guhera ku isaha ya saa Mbiri, abakinnyi bari biyandikishije gusiganwa muri Marathon na 1/2 cyayo bari bafashe Umuhanda, mu gihe nyuma y’iminota 50 abakina Run for Peace bakurikiyeho.
Aakoresheje amasaha abiri, iminota 17 n’amasegonda 41, Umunya-Kenya George Onyancha wari wabaye uwa gatatu mu mwaka ushize, yegukanye Marathon mpuzamahanga ya Kigali yitiriwe Amahoro.
Yakurikiwe na Silas Kiprotich Kurui wakoresheje amasaha abiri, iminota 18 n’amasegonda 11 mu gihe David Kipkorir yakoresheje amasaha abiri, iminota 18 n’amasegonda 43 akaba uwa gatatu.
Mu bagore, yegukanywe n’Umunya-Ethiopia Muluhebt Tsega akoresheje amasaha abiri, iminota 35 n’amasegonda 17, akurikirwa n’Umunya-Kenya Charop Sharon Jemutai wakoresheje amasaha abiri, iminota 36 n’amasegonda atanu naho Jemal Amid Foyza wo muri Ethiopia yabaye uwa gatatu.
Muri Half-Marathon mu bagabo, Umunyakenya Kennedy Kipyeko yayegukanye akoresheje isaha imwe, iminota itatu n’amasegonda 52, akurikirwa na Mburu John wakoresheje isaha imwe, iminota itatu n’amasegonda 54 mu gihe Kipkorir Evans yakoresheje isaha imwe, iminota ine n’amasegonda 12.
Nk’uko byagenze mu bagabo, mu kiciro cy’abagore, Abanya-Kenya bihariye ibihembo, Moseti Winfridah Moraa yegukana Half Marathon akoresheje isaha imwe, iminota 12 n’amasegonda 40, akurikirwa na Lilian Lelei Jepkemboi wakoresheje isaha, iminota 13 n’amasegonda 36 naho Susan Chambai Aramisi akoresha isaha, iminota 14 n’amasegonda 33.
Abanyarwandakazi baje hafi ni Yankurije Marthe wabaye uwa karindwi yakoresheje isaha, iminota 15 n’amasegonda 40 naho Musabyeyezu Adeline wari watsinze iki cyiciro mu 2022, yabaye uwa 10 akoresheje isaha, iminota 16 n’amasegonda abiri.
Uretse aba, Muhitira Felicien yegukanye umwanya wa 10 muri Half Marthon akoresheje
Kigali International Peace Marathon yitabiriwe n’abakinnyi bakomeye nyuma y’uko ibihembo byayo bizamuwe kuko kuri ubu ari iya gatatu ihemba amafaranga menshi muri Afurika, nyuma y’iya Lagos muri Nigeriya n’iya Nairobi muri Kenya.
Kuri iyi nshuro, umukinnyi wegukanye Marathon mu bagabo n’abagore yatsindiye ibihumbi 20$ [asaga miliyoni 22 Frw], uwa kabiri yahawe ibihumbi 15$ naho uwa gatatu atwara 7500$.
Mu basiganwe Igice cya Marathon [ibilometero 21,098], uwa mbere mu bagabo no mu bagore arahabwa 5000$ [asaga miliyoni 5,5 Frw], uwa kabiri abone 4000$, mu gihe uwa gatatu ahabwa 3000$.
Muri ibi byiciro byombi, hahembwa kuva ku mukinnyi wa mbere kugeza ku wa munani, aho muri Marathon uwa nyuma abona 1000$ naho muri Half-Marathon akabona 400$.
Twibutse ko mu bakinnyi 32 bahembwe mu byiciro bine [umunani ba mbere muri buri cyiciro] bya Kigali International Peace Marathon 2023, Abakinnyi bane gusa nibo badakomoka muri Kenya, aba bakaba barimo Abanya-Ethiopia batatu bakinnye muri Full Marathon y’Abagore n’Umunyarwandakazi Yankurije wabaye uwa karindwi muri Half Marathon.
Agaruka kuri iri rushanwa, Lt. Col (Rtd) Kayumba Lemuel uyobora Ishyirahamwe ry’imikino ngororamubiri mu Rwanda, mu kiganiro yahaye Itangazamakuru yagize ati:”Ku ruhande rwacu n’inzego twafatanyije kuritegura turashima uko ryagenze. Kuba ryitabiriwe n’abantu basaga 8000 bavuye mu bihugu hafi 50 byo mu Isi, iyi ni intsinzi kuri twe, gusa biraduha n’umukoro wo gukomeza kurinoza kugeza turishyize mu marushanwa 3 ya mbere kuri uyu Mugabane”.
Yakomeje ati:”Ku ruhande rw’Umusaruro ww’abakinnyi b’Abanyarwanda ntabwo wabaye mwiza, ariko ntabwo ari uko badashoboye ahubwo byatewe n’abo bari bahanganye”.
Yungamo ati:”Nyuma y’uko tuzamuye ibihembo bihabwa abaryegukanye, abakinnyi bakomeye kuri uyu Mugabane bose bahise bahanga Amaso Kigali barimo n’Umunya-Ethiopa wegukanye Marathon. Uyu ni umukinnyi ukomeye kuri uyu Mugabbane no ku Isi, kuko yegukanye na Marathon yakiniwe i Beirut mu gihugu cya Liban”.
“Nyuma y’uko umusaruro udahuye n’uwo twifuzaga, tugiye gukoresha imbaraga mu gutegura abakinnyi bacu, ku buryo mu mwaka utaha abakinnyi bacu bazatanga ibirenzeho”.
