Ishyirahamwe ry’Imikino Ngororamubiri mu Rwanda (RAF), ryateguye Shampiyona y’Igihugu ya Cross Country.
Iyi Shampiyona ngaruka mwaka, yaherukaga gukinwa tariki ya 02 Ukuboza 2023.
Icyo gihe, yegukanywe na Mutabazi Emmanuel mu bagabo na Imanizabayo Emelyne mu bagore.
Kuri iyi nshuro, abakinnyi 398 bavuye mu makipe 12, bazaba bahatanira kwegukana imidari mu byiciro bitandukanye, kuri uyu wa Gatandatu tariki ya 18 Mutarama 2025, guhera moya n’igice ku Isaha ya Kigali.
Uretse guhatanira imidari kandi, abazitwara neza muri iyi mikino, bazakurwamo abazahagararira u Rwanda mu mikino y’Isi ya Cross Country izakinirwa mu Mujyi wa Florida ho muri Leta zunze Ubumwe z’Amerika, tariki ya 10 Mutarama 2026.
Muri iyi mikino iteganyijwe kuri uyu wa Gatandatu, abakinnyi bazarushanwa mu byiciro bitanu, nk’uko ishami rya Tekinike mu Ishyirahamwe ry’Imikino Ngororamubiri ribitangaza.
Ibi byiciro bizaba bigizwe n’ikiciro cy’abagabo bakuru, abagore bakuru, abatarengeje imyaka 20 na 18 mu byiciro byombi.
Abagabo bakuru bazasiganwa intera ya Kilometero 10 (10Km), abatarengeje imyaka 20 basiganwe Kilometero 08 (8Km) mu gihe abari munsi y’imyaka 18 bazasiganwa Ibirometero o6 (6Km).
Mu kiciro cy’abagore, abakuru bazasiganwa Kilometero 10 (10Km), abatarengeje imyaka 20 basiganwe Kilometero 06Km (6Km), mu gihe abari munsi y’imyaka 18 bazasiganwa Kilometero 04 (4Km).
Amakipe ategerejwe muri iyi mikino, arimo; APR AC, Police AC, UR Huye AC, Sina Gerard AC, Nyaruguru AC, Rutsiro AC, Huye AC, Nyamasheke AC, GS St Aloys AC, Kavumu AC, Kamonyi AC na Kinyinya AC.
Uretse abakinnyi bazaba bari mu makipe, n’abakinnyi bifuza gukina ku giti cyabo, Ishyirahamwe ry’Imikino Ngororamubiri ryatangaje ko amarembo akinguye.
Ubwo iri rushanwa riheruka gukinwa, Mutabazi Emmanuel wa Police AC yahize abandi nyuma yo gukoresha iminota 30, amasegonda 28 n’ibice 31.
Yakurikiwe na Hitimana Noël wa APR AC wakoresheje iminota 30’53”66”’, Nsabimana Jean Claude aba uwa gatatu akoresheje iminota 31’04”51”’.
Mu bagore, Imanizabayo Emelyne wa Sina Gerard yahize abandi akoresheje iminota 34, amasegonda 57 n’ibice 38.
Yakurikiwe na Uwizeyimana Jeanne Gentille wa Police AC wakoresheje 35’03”51”’ na Musabyeyezu Adeline wa APR AC wabaye uwa gatatu akoresheje 35’19’16”’.
Amafoto
