Ikipe y’Ingabo z’Igihugu cy’u Rwanda, APR FC, yaraye ishyikirijwe Igikombe cya 22 cya Shampiyona.
Iki gikombe yagihawe nyuma yo gukina umukino w’Umunsi wa 30 wa Shampiyona wayihuje n’Ikipe y’Amagaju FC yo mu Karere ka Nyamagabe, umukino warangiye amakipe yombi aguye miswi y’igitego 1-1.
Iyi mikino 30 yaranze Umwaka wa Shampiyona 2023-24, APR FC yayikusanyijemo amanota 68, nyuma yo gutsinda imikino 19 ikanganya 11.
Ni Shampiyona y’amateka kuri APR FC, kuko ari ku nshuro ya kabiri yegukanye Shampiyona idatsinzwe Umukino n’umwe.
Ibihe nk’ibi yabiherukaga mu Mwaka w’Imikino 2021-22 ubwo yatozwaga n’Umunyatuniziya, Adil Mohammed Erradi.
Imbere y’abafana bari bakubise babukereye mu Myambaro y’Umweru n’Umukara, Sitade yitiwe Pelé i Nyamirambo mu Mujyi wa Kigali, ibintu byari ibicika guhera saa 13:00 zo kuri iki Cyumweru tariki ya 12 Gicurasi 2024.
Muri uyu mukino APR FC yahereweho igikombe, ibitego ku mpande zombi byatsinzwe na Bizimana Ibtihaj ku munota wa 32 ku ruhande rw’Amagaju, mu gihe kishyuwe na Ombolenga Fitina ku munota wa 60.
Abafana bari bitabiriye uyu mukino, basusurukijwe mu gihe cy’akaruhuko k’igice cya mbere, n’Umuhanzi Chris Eazy uri mu bakunzwe n’Urubyiruko kuri ubu.
N’ubwo Umutoza Thierry Froger yegukanye Igikombe cya Shampiyona adatsinzwe, Umuyobozi wa APR FC, Colonel Richard Karasira yatangaje ko uyu mutoza atazakomezanya n’iyi kipe mu Mwaka utaha w’imikino.
Uko amakipe yasoje Shampiyona y’i 2023-24
Ikipe/Ibitego amakipe azigamye / Amanota ikipe zifite
1. APR +30 68
2. Rayon +17 57
3. Musanze +10 53
4. Mukura +7 47
5. AS Kigali +1 46
6. Kiyovu +4 44
7. Police +1 39
8. Amagaju -1 39
9. Gasogi -3 36
10. Gorilla -7 35
11. Marines -10 35
12. Muhazi -8 33
13. Bugesera +2 32
14. Etincelles -9 32
15. Sunrise -15 32
16. Etoile -18 31.
Amafoto
