Mu gihe isoko ry’igura n’igurisha ryo mu Kwezi kwa mbere ririmbanyije hirya no hino ku Isi, amakipe yo mu bihugu yabengutswe abakinnyi bakina muri Shampiyona y’u Rwanda.
Umwe mu bavugwa, ni myugariro w’Ikipe y’Ingabo z’u Rwanda, APR FC, Niyigena Clément, bivugwa ko yashimwe n’Ikipe ya Olympique de Béja ikina mu kiciro cya mbere muri Tuniziya.
Mu gihe aya makuru akomeje gufata indi ntera, ubuyobozi bwa APR FC, bwatangaje ko uyu mukinnyi ntaho ateze kujya, kuko ari umwe mu nkingi za mwamba igendera mu bwugarizi.
Bwagize buti:“Abakinnyi bacu tubaba hafi buri uko bwije n’uko bucyeye. Dukora byose ngo tubagumane, kandi na Niyigena n’umwe mu bo tudatenga kurekura. Nta busabe bw’ikipe iyo ariyo yose yo muri Tuniziya twakiriye”.
N’ubwo bivugwa ko uyu mukinnyi ashakishwa, amaze amezi arindwi yongereye amasezerano y’Imyaka ibiri akinira iyi kipe iri mu z’ibihangange mu Rwanda.
Kugeza ubu, APR FC ifata aya makuru nk’ibihuha, kugeza igihe izabonera ubusabe bunyuze mu nzira zemewe.
Niyigena yatsindiye APR FC ibitego bibiri mu mikino cumi n’itanu yaranze ibanza ya Shampiyona y’u Rwanda, 2024-25.
N’ubwo kugeza ubu atarabasha kumenera muri ba myugariro b’Ikipe y’Igihugu, Amavubi ngo abanze mu kibuga, n’umwe mu bambere barebwaho, mu gihe hagati ya Mutsinzi Ange na Manzi Thierry hari ugize ikibazo.
Ku myaka 24 y’amavuko, Niyigena yinjiye muri APR FC mu 2017 akina mu Ikipe y’abato, mbere y’uko yerekeza mu Ikipe ya Intare FC mu 2028, nyuma akomereza muri Marine FC hagati ya 2019-2020.
Hagati ya 2020-2022, uyu mukinnyi yakiniye Ikipe ya Rayon Sports FC, aba umwe muri bacye bakiniye aya makipe yombi ahora ahanganye.