Impuzamashyirahamwe ya ruhago ku Isi FIFA, yashyize mu Nkangara (Pot) imwe ya 5, ikipe y’Igihugu y’u Rwanda Amavubi n’Intamba mu Rugamba z’u Burundi mu mikino yo gushaka itike y’igikombe cy’Isi cy’i 2026 kizabera mu bihugu cya Canada, Mexique na Leta zunze Ubumwe za Amerika.
Uretse u Burundi, u Rwanda rwisanze mu Nkangara kandi rusangiye n’ibindi bihugu birimo; Comoros, Niger, Botswana, Sudan, Ethiopia, Eswatini na Liberia.
Amwe mu mategeko agenga imikino yo gushaka iyi tike, harimo ko Ibihugu bisangiye Inkanga bitazahura mu gihe imikino nyirizina izaba itangiye.
Ni mu gihe tariki ya 12 Nyakanga 2026 i Zurich mu gihugu cy’Ubusuwisi ku kicaro cya FIFA, aribwo amakipe y’Ibihugu bibarizwa mu Impuzamashyirahamwe ya ruhago muri Afurika CAF, azashyirwa mu matsinda.
N’ubwo yakozwe mu jisho na Mozambique mu kwezi gushize i Huye mu mukino wo gushaka itike y’igikombe cy’Afurika kizabera muri Ivory Coast umwaka utaha, umutoza w’Amavubi Carlos Alos Ferrer atangaza ko mu gihe yakomeza kuyatoza, yazayashyira mu bihugu 9 bizahagararira uyu Mugabane mu mikino ya nyuma y’igikombe cy’Isi.
Biteganyijwe ko imikino yo gushaka itike ya nyuma yo kuzitabira Igikombe cy’Isi cya FIFA 2026, izatangira tariki ya 23 Ugushyingo 2023, ikaba izakinwa mu gihe cy’Imyaka 2.
Uko amakipe yashyizwe mu Nkangara ku rwego rw’Afurika
Inkanga ya 1: Nigeria, Morocco, Senegal, Algeria, Tunisia, Cameroon, Mali, Egypt, Ivory Coast
Inkanga ya 2: Ghana, Burkina Faso, South Africa, Cape Verde, DR Congo, Guinea, Zambia, Gabon, Equatorial Guinea
Inkanga ya 3: Angola, Benin, Kenya, Mauritania, Congo, Uganda, Madagascar, Guinea Bissau, Namibia.
Inkanga ya 4: Mozambique, Gambia, Sierra Leone, Togo, Tanzania, Zimbabwe, Central African Republic, Malawi, Libya
Inkanga ya 5: Niger, Comoros, Sudan, Rwanda, Burundi, Ethiopia, Eswatini, Botswana, Liberia
Inkanga ya 6: Lesotho, South Sudan, Mauritius, Chad, Sao Tome, Djibouti, Seychelles, Eritrea, Somalia