Ikipe y’Ababiligi, Pierre de Froidmont ukina afatanyije na Axel Baumans begukanye Irushanwa ngaruka mwaka ry’umukino w’Amagare akinirwa mu Misozi, rizwi nka Rwandan Epic.
Iri rushanwa ryasorejwe mu Karere ka Rubavu mu Ntara y’i Burengerazuba kuri uyu wa Gatanu tariki ya 25 Ukwakira 2024, nyuma yo gutangirira mu Mujyi wa Kigali mu Karere ka Nyarugenge tariki ya 21 Ukwakira 2024.
Iyi kipe yegukanye iri rushanwa nyuma yo gukoresha Amasaha 11, Iminota 23 n’Amasegonda 42, ku ntera ireshya na Kilometero 254.
Bakurikiwe n’Ikipe igizwe n’abakinnyi bakomoka mu Budage, Daniel Gathof ukinana na Peter Schermann, bakoresheje Amasaha 11, Iminota 39 n’Amasegonda 31, mu gihe umwanya wa gatatu wegukanye n’Ikipe y’Abanyarwanda, igizwe na Munyaneza Didier ukinana na Banzi Bukhari.
Aba bakinnyi b’Abanyarwanda, bakoresheje Amanota 12, Iminota 04 n’Amasegonda 15.
N’ubwo begukanye iri Rushanwa, ntabwo Pierre de Froidmont and Axel Baumans bahiriwe na Etape ya 4 n’iya 5.
Etape ya 5 yari n’iya nyu,a, yegukanywe n’Ikipe ya Daniel Gathof na Peter Schermann, nyuma yo gusoza Kilometero 65 na Metero 500 ari aba mbere.
Iyi Etape yasorejwe ku Kiyaga cya Kivu, yahagurukiye ku Kicaro cy’Akarere ka Nyabihu, inyura mu Ishyamba rya Gishwati, isorezwa i Rubavu.
Daniel Gathof na Peter Schermann, yari Etape ya kabiri begukanye ndetse banikurikiranya, nyuma yo gutwara Etape ya 4 yari yakiniwe mu Karere ka Musanze ahazwi nko mu Kinigi.
Kwegukana izi Etape 2 zikurikiranya, yari amahirwe yo kwegukana irushanwa muri rusange, gusa ntabwo borohewe no gukuramo Iminota 15 bari basizwe n’Ikipe ya Froidmont ukinana na Baumans, muri Etape 3 zabanje.
Mu kiciro cy’Ikipe igizwe n’Umugabo n’Umugore, iri rushanwa ryegukanywe n’Ikipe y’Abakinnyi bakomoka i Seville muri Esipanye, Oscar Pujol ukinana na Mude Rodriguez.
Bakoresheje Amasaha 14, Iminota 19 n’Amasegonda 30, bakurikirwa n’Ikipe y’Abanyarwanda, Xaverine Nirere ukinana na Eric Muhoza, bakoresheje Amasaha 14, Iminota 03 n’Amasegonda 56.
Xaverine Nirere na Eric Muhoza, bakina nk’abakinnyi babigize umwuga, mu Ikipe ya Amani yo mu gihugu cya Kenya.
Mu kiciro cy’Ikipe igizwe n’abakinnyi b’abagore, Rwandan Epic 2024 yegukanywe n’Ikipe igizwe n’Umunyarwandakazi, Martha Ntakirutimana ukina afatanyije n’Umubiligikazi, Siska Marrécau.
Basoje Kilometero 254 bakoresheje Amasaha 16, Iminota 03 n’Amasegonda 31.
Umukinnyi w’Umugabo ukina ku giti cye, Rwandan Epic 2024 yegukanywe n’Umunyarwanda, Etienne Tuyizere wakoresheje Amasaha 12, Iminota 57 n’Amasegonda 05.
Rwandan Epic n’Isiganwa ry’Umukino w’Amagare anyuma mu Misozi, azwi ku izina rya Mountain Bike mu Ndimi z’Amahanga.
Kuri iyi nshuro, ryitabiriwe n’abakinnyi 65 bavuye mu 16 birimo n’u Rwanda.
Ritegurwa hagamijwe kwerekana Ibyiza by’u Rwanda, rikitabirwa n’abakinnyi baturutse Imihanda yose y’Isi.
Pierre de Froidmont na Axel Baumans, begukanye iry’uyu Mwaka basimbuye Ikipe ya Daniel Gathof yaryegukanye Umwaka ushize ubwo ryakinwaga ku nshuro ya gatatu.
Amakuru THEUPDATE ifite, n’uko Rwandan Epic y’Umwaka utaha (2025), izakinwa muri Gashyantare (2), mu rwego rwo kwirinda kugonganisha imyiteguro yayo na Shampiyona y’Isi y’Amagare (Road Race).
Amafoto
