Umuhanzikazi Bwiza Emerance uri mu bagezweho muri muzika Nyarwanda, agiye gushyira hanze Album nshya yise “My Dream”. Iyi Album izaba igizwe n’indirimbo 14, yayimurikiye Itangazamakuru kuri uyu wa Kabiri, avuga ko ayigereranya n’imfura azaba yibarutse kuko izaba ari ya mbere ashyize hanze.
Mu kiganiro n’Itangazamakuru kuri uyu wa Kabiri tariki 18 Nyakanga 2023 cyabereye kuri Onomo Hotel, Bwiza yavuze ko ajya gutangira urugendo rw’umuziki ‘numvaga ari ibintu bitazashoboka’. Ashima itangazamakuru ku bw’uruhare ryagize mu iterambere rye.
Ati:”Ndashimira cyane itangazamakuru ko mukomeje kunshyigikira. Njya gutangira umuziki numvaga bitazoroha ariko uburyo itangazamakuru ryamfashije byahumurije umutima wanjye. Ni ubwa kabiri mpagaze imbere y’abanyamakuru benshi ubwa mbere bwari ubwo nerekanwaga nk’uwatsinze muri ‘Next Diva’. Ndashimira ikipe dukorana muri KIKAC.”
Iyi album yasohotse nyuma yo gushyira hanze indirimbo zari zigize Extended Play (EP) ye ya mbere yise ‘Connect Me’.
Bwiza yavuze ko iyi album yayise ‘My Dream’ kubera ko ‘kuba umuhanzi byari kimwe mu bintu nifuza’. Yavuze ko no kugira album ‘ari bimwe mu byiza nahoze nifuza’. Ati “Niyo mpamvu nahisemo kuyita inzozi zanjye.”
Umuyobozi Ushinzwe Ibikorwa bya Kikac Music Label, Uhujimfura Claude avuga ko uruhare rw’itangazamakuru mu kumenyakanisha umuziki ‘byatumye n’ibihangano bya Bwiza bimenyekana’.
Iyi album Bwiza yatangiye kuyikoraho muri Mutarama uyu mwaka. Yayifashijweho n’abanditsi barimo Niyo Bosco ndetse na Mico The Best. Abatunganya indirimbo bayikozeho barimo Tell Them, Santana, Nizbeat, Loader, Prince Kiiiz n’abandi.
Iriho indirimbo 14 zirimo iyo yise ‘Amahitamo’, ‘Amarangamutima’, ‘Are You Ok’, ‘Carry me’, ‘Monitor’ yakoranye na Niyo Bosco, ‘MR DJ’, ‘Niko Tamu’ yakoranye na Ray Signature na Allan Toniks, ‘Nobody’ yahuriyemo na Double Jay, ‘Sextoy’, ‘Rudasumbwa’ n’izindi.
Indirimbo zose ziriho zimara iminota 48 n’amasegonda 15.
Amafoto
