Urukiko rwo muri Leta ya Florida muri USA rwategetse ko umwana w’umukobwa w’imyaka umunani ahabwa indishyi y’ibihumbi 800$ (angana na miliyoni 941 Frw) nyuma yo kotswa n’inyama y’inkoko muri Restaurant.
Ikinyamakuru cy’Abongereza BBC, cyatangaje ko inyama yaguye ku kaguru ka Olivia Caraballo iramutwika cyane.
Ubwo Olivia yashyaga mu 2019, yari afite imyaka ine gusa y’amavuko.
Bivugwa ko Olivia yahiye ari kurya ibiryo bya Mc Donald’s bizwi nka ‘Happy Meals’ bisanzwe bigenerwa abana.
Umuryango we umaze kubona ibibaye, wahise ushora ikirego, urega Mc Donald’s n’iduka basanzwe bafitanye amasezerano y’imikoranire ry’ikigo ‘Upchurch Foods’.
Nyuma y’ubusesenguzi bwimbitse kuri iki kibazo, Urukiko rwo muri Leta ya Florida rwategetse ko Caraballo agomba guhabwa n’aba bombi indishyi y’ibihumbi 800$ bitewe n’ububabare yagize ku mubiri no ku marangamutima.
Mama wa Olivia, Philana Holmes yabwiye itangazamakuru ko yishimiye uburyo Urukiko rwateze amatwi Umukobwa we ndetse Inteko y’iburanisha igafata umwanzuro ushyize mu gaciro”.
Ati: Biranshimishije. Mu by’ukuri ntago nari mbyiteze. Kuri njye, birenze gushyira mu gaciro.
N’ubwo washimye, umuryango wa Olivia warakorewe ibitandukanye n’ibyo wifuzaga nk’indishyi, kuko wari wasabye indishyi y’akababaro ihwanye na Miliyoni 15 z’Amadorari.
