Sitade ya Parc des Princes iri i Paris mu Bufaransa, iraba ihanzwe amaso n’abatari bacye mu bakunzi ba ruhago ku Isi kuri uyu wa Gatatu tariki ya 07 Gicurasi [5] 2025.
Imbere y’abafana 48,583 nk’uko byitezwe, Paris Saint Germain [PSG] yatsinze igitego 1-0 mu mukino ubanza wa kimwe cya kabiri, izaba yakiriye Arsenal yifuza gusubira kuri finale iherukaho mu 2006.
Mu gihe Arsenal ifite izi nzozi, PSG nayo n’uko kuko ikumbuye ahantu iheruka mu 2020 ubwo yahatsindirwaga na FC Bayern Munchen igitego 1-0.
Mbere y’uko rwambikana, Louis Enirque utoza iyi kipe yo ku murwa mukuru w’Ubufaransa, yatangaje ko Ousmane Dembélé atazakina uyu mukino nyuma y’imvune yakuye mu mukino ubanza wakinwe mu kabiri w’Icyumweru gishize.
Mu gihe yatekerezago uko azikura imbere ya Arsenal na Ousmane Dembélé, hiyongereyo umukinnyi wo hagati mu kibuga ukina asatira, Lee Kang In, wavunikiye mu mukino batsinzwemo na Strasburg ibitego 2 kuri kimwe mu mpera z’Icyumweru gishize.
Gusa, PSG igiye kwakira uyu mukino ifite intsinzi y’igitego 1-0 cyatsinzwe na Ousmane Dembélé ku munota wa 4 w’umukino ubanza.
Uyu Dembélé, amaze gutsindira PSG ibitego 33 atanga n’imipira 9 yavuyemo ibitego muri uyu mwaka w’imikino.
Ku ruhande rwa Arsenal, Mikel Arteta, arishimira ko yagaruye mu Thomas Partey utarakinnye umukino ubanza kubera kuzuza amakarita abiri y’Umuhondo.
Uretse Partey, yagaruye kandi kapiteni we Martin Odegaard, wari wagiriye imvune yoroheje mu mukino wa shampiyona batsinzwemo na AFC Bournemouth ibitego 2 kuri 1 mu mpera z’Icyumweru gishize.
Ikipe izarokoka hagati ya PSG na Arsenal, izacakirana n’iza kuva hagati ya Inter Milan na FC Barcelona, mu mukino wa nyuma uzabera kuri Sitade ya Bayern Munchen, Allianz Arena tariki ya 31 Gicurasi [5] 2025.