Rayon Sports yakoze ‘impinduka mu batoza’ zigamije guha ibyishimo abafana

Ubuyobozi bw’ikipe ya Rayon Sports bwakoze impinduka mu batoza b’amakipe yayo yombi. Aya makipe arimo y’abagabo n’iy’abagore.

Ibinyujije ku rukuta rwayo rw’urubuga nkoranyambaga rwa X yahoze ari Twitter, yatangaje ko Rwaka Claude wari usanzwe ari umutoza mukuru w’ikipe y’abagore, yahinduriwe inshingano akagirwa umutoza wungirije mu ikipe y’abagabo.

Azungiriza Roberto Oliveira Gonçalves do Carmo uzwi nka Robertinho, wari umaze igihe atoza iyi kipe y’abafana benshi ari wenyine.

Mu ikipe y’abagore, Rwaka yakoze amateka yo kwegukana igikombe cya shampiyona adatsinzwe. Uretse aha mu ikipe y’abagore, Rwaka kandi yanyuze mu ikipe ya Mukura VS&L nk’umutoza wari wungirije Haringingo Francis.

Mbere yo kugirwa umutoza w’ikipe y’abagore, Rwaka yabanje kandi kunyura muri Rayon Sports, ndetse ayifasha kwegukana igikombe cy’amahoro mu 2023.

Umwanya wa Rwaka mu ikipe y’abagore, wahawe Rudasingwa Fleury Iquel. Uyu yigeze kunyura mu ikipe ya La Jeunesse FC nk’umutoza mukuru.

Muri Rayon Sports y’abagore, Rudasingwa azungirizwa na Dushimimana Djamila wari usanzwe ari Team Manager.

Dushimimana yahawe izi nshingano nyuma y’uko yabonye impamyabumenyi yo gutoza CAF B- License.

Izi mpinduka zakozwe mu gihe Rayon Sports y’abagabo iri ku gitutu cyo kugumana umwanya wa mbere iriho kugeza ubu, aho irusha mukeba wayo APR FC inota rimwe gusa.

Mu bagore ho iratengamaye, kuko yamaze kwegukana igikombe n’ubwo shampiyona itararangira.

Mu mpera z’iki Cyumweru, Rayon Sports y’abagabo iracakirana na Marine FC mu mukino w’umunsi wa 23 uzakinirwa i Rubavu, mu gihe mukeba wayo, APR FC izisobanura na Bugesera FC mu mukino uzakinirwa i Nyamata.

 

Leave a Reply

Your email address will not be published. Required fields are marked *