Rwigira Alphonse, Umworozi wabigize umwuga utuye mu Karere ka Gisagara Umurenge wa Kansi, afite inka 9 aho imwe muri zo ikamwa litiro 40 ku munsi, kuri ubu akaba avuga ko amaze gutera imbere kuko ashobora kubona amafaranga agera kuri miliyoni 1 Frw ku kwezi.
Uyu muturage avuga ko uretse kugurisha akabona amafaranga atunga umuryango, anafasha abaturanyi be bafite ibibazo by’imirire mibi mu bana.
Kuba inka ye ikamwa amata menshi, Rwigira avuga ko abikesha kuyitaho neza akayigaburira bihagije.
Usibye iyi nka ikamwa litiro 40, Rwigira avuga ko izindi nka 8 afite, nta nka ye ikamwa munsi ya litiro 30 ku munsi.
Ubworozi bwe akora kinyamwuga bwamufashije kwiteza imbere, aho kuri ubu amaze kugira ubutaka burenga hegitari 10 agenda agura amafaranga ava muri ubu bworozi.
Uretse kuba ubu bworozi bumaze kumuteza imbere n’umuryango we, Rwigira avuga ko amaze koroza abaturanyi be 17 nabo ubu bakaba bamaze kwiteza imbere.
Kuri ubu mu nka 9 afite, 6 zirakamwa.
Amafaranga yinjiza ku kwezi avuye mu mata agera kuri miliyoni 1 Frw ku kwez kandi yakamiye n’abaturanyi be.
Uyu muhinzi mworozi kuri ubu afite abakozi 6 bahoraho bamufasha kwita ku nka ze. (RBA)
