Séraphin Twahirwa, Umunyarwanda wakatiwe burundu n’Urukiko rwo mu Bubiligi nyuma yo kumuhamya gukora Jenoside yakorewe Abatutsi mu Rwanda mu 1994, yapfuye afite Imyaka 66.
Urupfu rwa Twahirwa, rwahamijwe n’Umuryango we binyuze mu itangazo washyize hanze ndetse n’uwari Umunyamategeko we, Maître Vincent Lurquin habiyamije, nk’uko Ikinyamakuru cy’Abongereza BBC dukesha iyi nkuru kibivuga. Gusa, ntabwo THEUPDATE irabibonera gihamya.
Uyu Munyamategeko yatangarije iki gitangazamakuru ko Twahirwa yapfuye Ejo ku wa Gatanu tariki ya 27 Ukuboza 2024, aguye i i Buruseli mu Bubiligi.
Ati:“Ntabwo twahimba inkuru y’uko yapfuye. Séraphin Twahirwa wari Umukiliya wanjye ntakiri muzima. Yapfuye nyuma y’iminsi akuwe muri Gereza, ajyanwa kuvurirwa mu ndembe (Soins palliatifs), mu Bitaro bya Saint-Luc i Buruseli mu Bubiligi”.
“Mu minsi ishize, nagiye kumusura aho yari arwariye, ariko nabonaga ko atazarusimbuka”.
Maître Vincent Lurquin wunganiraga Twahirwa, yavuze ko yari asanzwe arwaye Kanseri y’Akaguru, yakomotse ku mpanuka yagize mu Myaka y’i 1980.
Ati:“Yari afite ukuguru k’ugukorano (Prothèse). Uretse iyi Kanseri kandi, yari asanzwe arwaye na Diyabete. Nyuma yo gukatirwa burundu, yari yasabye ko atajyanwa muri Gereza kubera uru ruhurirane rw’Indwara, ariko Ubutabera bw’Ububiligi ntabwo bwabimwereye”.
Yakomeje agira ati:“Aho agereye muri Gereza, ibintu byarushijeho kumera nabi. Yatangiye kuremba kurushaho, ndetse bigaragara ko ashobora gupfira muri Gereza, ariko icyemezo cy’Urukiko cyagumye uko kiri”.
Guhera tariki ya 20 Ukuboza 2023, Twahirwa yari afungiye muri Gereza ya Haren i Buruseli ku murwa mukuru w’Ububiligi.
Yajyanywe muri iyi Gereza nyuma yo guhamywa n’Urukiko rwa Rubanda ruca Imanza zikomeye, Ibyaha bya Jenoside yakorewe Abatutsi mu Rwanda mu 1994.
Uru Rukiko rwamuhamije kwica Abatutsi barenga 65, gushaka guhitana abandi 13 no gufata ku ngufu abakobwa 12 bo mu Bwoko bw’Abatutsikazi mu gihe cya Jenoside yakorewe Abatutsi mu 1994.
Ibi byaha yahamijwe, Urukiko rwavuze ko yabikoreye i Gikondo mu Mujyi wa Kigali aho yari atuye, aho rwavuze ko yabikoranye n’Interahamwe yari ayoboye.
Uretse ibi Byaha, yahamijwe kandi urupfu rw’Abatutsi bari bahungiye ku Ishuri ry’Imyuga rya ETO (Ecole Technique Officielle) ryo ku Kicukiro mu Mujyi wa Kigali.
Gusa, ibi byaha byose yarinze akatirwa abihakana. Yabihakanye avuga ko ari mu bambere bahunze ubwo Indege yari itwaye Juvénal Habyarimana wari Perezida w’u Rwanda yahanurwaga.
Yavuze ko yahisemo guhunga kugira ngo akize Umuryango we cyane ko yari afite Umugore w’Umututsikazi.
Uyu mugabo yari mu bari batinyitse ku butegetsi bwa Habyarimana, kuko yari Mubyara wa Agathe Kanziga, wari Umugore wa Habyarimana (Perezida).
Muri uru rubanza, Twahirwa ko yaba Abatangabuhamya bamushinjaga ndetse n’Umucamanza, bavugaga ibinyoma bamubeshyera, kuko bari babitumwe n’ubuyobozi bw’u Rwanda.
N’ubwo yavugaga ibi, Abunganira abazize n’abarokotse Jenoside yakorewe Abatutsi, bavuze ko ayo yari ari amayeri yo guhakana Ibyaha yashinjwaga.