Minisiteri y’Abakozi ba Leta n’Umurimo (MIFOTRA), ivuga ko u Rwanda rwihaye intego yo guhanga imirimo iboneye kandi ituma abayirimo babona n’ubumenyi butuma baguma ku isoko ry’umurimo.
Mu ntangiriro z’uyu mwaka wa 2024, ikigero cy’ubushomeri cyageze munsi ya 15% bitewe n’ishoramari ry’Abanyarwanda n’Abanyamahanga ryakozwe mu nzego zirimo n’inganda mu myaka 3 ishize bituma abashomeri bagabanukaho 7%.
Uruhererekane rw’ibicuruzwa bituruka mu nganda bikoherezwa mu maguriro manini azwi nka Super Markets, ni hamwe mu hagaragara amahirwe y’akazi kuri benshi.
Muri gahunda ya 2 yo kwihutisha iterambere NST 2, igihugu cyihaye intego yo kuzaba cyarahanze imirimo mishya 1,250,000 mu myaka 5 izagera ku musozo muri 2029.
Impuguke mu by’umurimo, Jean Mukunzi asanga hakenewe guhuza imikorere y’inzego zishinzwe guhanga imirimo kugira ngo birusheho gukurikiranwa neza.
Imibare y’Ikigo cy’Igihugu cy’Ibarurishamibare, NISR igaragaza ko muri Gicurasi 2024 Abanyarwanda bagera kuri miliyoni 8.1 ari bo bari bagejeje igihe cyo gukora, ababarirwa muri miliyoni 4.3 bari bafite akazi, ariko miliyoni 2.8 byabo ari bo bafite akazi gahoraho.
Minisitiri w’Abakozi ba Leta n’Umurimo, Ambasaderi Christine Nkulikiyinka avuga ko hakenewe kubakwa urwego rw’umurimo ruhamye ruzarushaho gutanga akazi mu buryo burambye.
Yagize ati:”Kubona akazi kaboneye kuri bose bakifuza ni kimwe mu bibazo bikomeye kandi bikeneye gushyiraho uburyo buhamye bw’urwego rw’umurimo rutanga akazi mu buryo burambye”.
“Bitewe n’uburyo byihutirwa kandi bikenewe cyane ku rwego rw’isi, birumvikana ko guhangana nabyo si amahitamo ahubwo ni ngombwa”.
“Mu gihe turangajwe imbere no kugera kuri izi ntego, tugomba gushyira imbaraga mu ihangwa ry’imirimo iboneye, ifite ireme kandi iteza imbere ubumenyi bukenewe ku isoko ry’uyu munsi n’ejo hazaza h’umurimo.”
Bitarenze mu 2030, isi yihaye intego yo kuzaba yarahanze imirimo mishya miliyoni 600 ni ukuvuga imirimo miliyoni 40 igomba guhangwa buri mwaka. (RBA)