Ikigo cy’Abafaransa gicuruza amashusho, Canal+, yahamirije abakiriya bayo ko yerekana imikino y’amakipe yahize ayandi ku Mugabane w’u Burayi izwi nka UEFA Champions League.
Ibi byagarutsweho kuri uyu wa 01 Ukwakira 2024, mu kiganiro cyahuje ubuyobozi bw’iki kigo ishami ryo mu Rwanda n’Abanyamakuru ba Siporo.
Umuyobozi wa Canal+ Rwanda, Madamu Sophie Tchatchoua, yahamije ikigo ahagarariye kemerewe kwerekana iyi mikino, anaboneraho gukuraho urujijo rwari rufitwe na bamwe.
Tchatchoua yavuze ko iyi mikino ikundwa n’abatari bacye ku Isi by’umwihariko mu Rwanda izwi nk’imikino iraza abatari bacye amajoro, inyura kuri Shene ya Canal+Sport 112.
Kuri iyi Shene, Canal+ yemerewe kwerekana Umukino w’Umunsi. N’ukuvuga umukino uba ukomeye kurushan iyindi, cyangwa se uw’ikipe y’Igikonyozi. Uyu mukino utambura ku munsi wo ku wa Gatatu.
Indi mikino yose isigaye irimo n’iba yakinwe ku wa kabiri, Madamu Tchatchoua yasobanuye ko Canal+ yemerewe kuyerekana ku bufatanye na Shene za DSTV, binyuze kuri Bouquet izwi nka English Package.
Izi Shene zerekana iyi mikino yose n’i izigaragara ku 116, 117, 118 n’i 119.
Muri iki kiganiro kandi, hagaragarijwemo uko umukiriya wa Canal+ yakwemererwa kureba izi Shene zone.
Ku mukiriya usanzwe ugura Ifatabuguzi (Abonema) ry’Ibihumbi Icumi (10,000 Frw) izwi nka Zamuka, yemerewe kureba Umukino w’Umunsi, utambuka ku wa Gatatu.
Ku girango uyu mukiriya abashe kureba indi mikino yose, azajya yongera amafaranga 12,000 Frw gusa ku Ifatabuguzi yari asanzwe agura, ubundi yose hamwe abe ibihumbi 22,000 Frw, amuheshe kureba iyi mikino yose.
Uretse umukiriya ugura Ifatabuguzi rya Zamuka, ku mukiriya ugura irya Zamuka na Siporo rigura 20,000 Frw, azajya yongeraho nawe 12,000 Frw, yose hamwe abe 32,000 Frw, ahite areba iyi mikino yose.
Uretse abakiriya bagura Ifatabuguzi rya Zamuka ndetse na Zamuka na Siporo, hari kandi abagura Ifatabuguzi ry’Ubuki rigura 30,000 Frw.
Uyu mukiriya ugura Ifatabuguzi ry’Ubuki, azajya we yongeraho amafaranga Ibihumbi bitanu (5,000 Frw) gusa, bimuheshe kureba aya mashene yose.
Uretse iyi mikino ya UEFA Champions League, izi Shene zo kuri English Package, zizajya zigaragaraho imikino ya UEFA Europa League, EUFA Conference League, UEFA Nations League, Shampiyona zose zo ku mugabane w’Uburayi ndetse n’indi mikino yose ikomeye ku Isi.
Kugura iri fatabugizi, bikorwa hakoreshejwe uburyo bwa Mobile Money cyangwa se rikagurwa binyuze ku bacuruzi ba Canal+.
