Ikipe y’Igihugu y’u Rwanda, Amavubi, yagumye ku mwanya yari iriho w’i 131 yariho mu Kwezi gushize, ku rutonde ngaruka Kwezi rutangazwa n’Impuzamashyirahamwe y’Umupira w’amaguru ku Isi, FIFA.
Uyu mwanya, Amavubi awukesha kuba akomeje kwitwara neza mu mikino yo mu Itsinda rya Gatatu, mu yo gushaka itike y’Igikombe cy’Isi kizabera muri USA, Canada na Maxique mu 2026.
Uru rutonde rwatangajwe tariki ya 17 Nyakanga 2024, rugaragaza ko uretse umwanya w’i 131 ku Isi, u Rwanda ruri ku mwanya wa 40 muri Afurika.
Ikipe y’Igihugu ya Marike niyo iyoboye izindi muri Afurika, gusa yamanutseho imyanya ibiri, iva ku wa 12 ku Isi, ijya ku wa 14.
Ku Mugabane w’Afurika, Maroke ikurikiwe na Senegal iri ku mwanya wa 19 ku Isi, mu gihe Misiri iri ku mwanya wa 3 n’uwa 36 ku Isi.
Mu Karere, Uganda niyo iyoboye ibindi bihugu n’umwanya wa 95 ku Isi, ikurikiwe na Kenya iri ku mwanya w’i 108, Tanzaniya igakurikiraho n’umwanya w’i 113, mu gihe Sudani iri ku mwanya w’i 121.
Ku ruhando rw’Isi muri rusange, urutonde ruybowe na Argentine, ugubwa mu ntege n’Ubufaransa.
Mu bihugu bitanu bya mbere kandi, Esipanye iri ku mwanya wa Gatatu nyuma yo kwegukana Igikombe cy’Uburayi, uyu ikaba yawugiyeho ivuye ku wa 5 yari ho mu Kwezi kwa Gatandatu.
Umwanya wa kane ufitwe n’Ubwongereza batsindiwe ku mukino wa nyuma w’Igikombe cy’Uburayi, mu gihe Igihangange muri ruhago y’Isi, Brazil, iri ku mwanya wa 5, ivuye ku wa 4 yari iriho mu Kwezi gushize.