Paris Saint-Germain yemeye kugurisha rutahizamu w’Umunya-Brazil, Neymar Junior muri Al-Hilal yo muri Shampiyona ya Arabie Saoudite kuri miliyoni 77,6 £.
Neymar Junior yamaze kumvikana na Al-Hilal kuri buri kimwe cyose kugira ngo ayibere umukinnyi guhera mu mwaka wa 2023-24 ndetse na PSG yemeye kumurekura akajya gukora ibizamini by’ubuzima.
Ku Cyumweru, tariki ya 13 Kanama 2023, ni bwo Neymar yatanze ubusabe ku ikipe ye ndetse n’umuyobozi wayo ko yifuza kuyisohokamo akerekeza muri imwe mu makipe yamwifuzaga.
Mu mpera z’icyo cyumweru ni bwo Perezida wa PSG, Nasser Al-Khelaifi, yahise agirana ikiganiro na bamwe mu bakinnyi bashobora gusohoka mu ikipe barimo na Neymar Junior.
Aha ni ho yahaye umugisha icyifuzo cya Neymar cyo kuba yakumvikana n’uwo ashaka wese. Kuri uyu wa Mbere ni bwo amakuru yagiye hanze anemeza ko agiye kumara imyaka ibiri muri Al-Hilal yo muri Arabie Saoudite.
Neymar ni umwe mu bakinnyi beza bari ku Isi bagiye kwerekeza mu Barabu ahari kwerekeza abakinnyi benshi batandukanye kandi bakomeye. Ikinyamakuru Sky Sports cyatangaje ko uyu mugabo yasinye imyaka ibiri muri Al-Hilal , azajya ahabwa umushahara wa miliyoni 300 £.
Uyu mushahara agiye guhembwa ku myaka 31, wikubye inshuro esheshatu uwo yari asanzwe yinjiza muri Paris Saint-Germain.
Nubwo azahembwa ako kayabo ntari mu bakinnyi bazaba bahembwa amafaranga menshi kuko Cristiano Ronaldo wa Al-Nassr ari guhabwa miliyoni 200 £ ku mwaka.
Mu gihe yahamaze nabwo yigeze yegukana Igikombe cya UEFA Champions League yarayikiniye imikino 173 ndetse ayifasha kwegukana ibikombe 13 harimo bitanu bya Ligue 1.
Abafana ba Paris Saint-Germain bari barambiwe imvune z’uyu mukinnyi wakunze kuvunika akagombambari inshuro nyinshi ndetse iyo aherutse no gukiruka indi muri Gicurasi 2023.
Neymar afite agahigo ko kuba ariwe mukinnyi waguzwe akayabo kuko yatanzweho miliyoni 222 £ avuye muri FC Barcelone mu 2017.