Umukinnyi mpuzamahanga w’Umurundi, Aruna Moussa Madjaliwa uheruka kwerekanwa mu bakinnyi bashya ba Rayon Sports, yayishyize mu ihurizo nyuma yo kuyibeshya ku byangombwa bigaragaza neza ikipe zimufiteho uburenganzira.
Ku wa Gatandatu, tariki ya 12 Kanama 2023 nibwo Rayon Sports yakinnye umukino wa Super Cup na APR FC ndetse iza no kwegukana iigikombe itsinze ibitego 3-0.
Mbere y’uko umukino utangira umutoza wa Rayon Sports, Yamen Zelfani, yagaragaje urutonde rw’abakinnyi aza kubanza mu kibuga barimo Madjaliwa ariko umukino utangiye ntiyagaragara mu kibuga.
Benshi mu bawukurikiranye bayobewe ibibaye, abandi bakeka ko yaba yagize ikibazo cy’imvune mu mwanya wo kwishyushya.
Ukuri kwari inyuma ya byose ni uko uyu mukinnyi waturutse muri Bumamuru FC y’i Burundi yari afite ibyangombwa bituzuye bitamwemereraga kuba umukinnyi wa Rayon Sports.
Hagati y’amakipe yombi nta kibazo cyarimo kuba yakina ariko nk’uko Ishyirahamwe rya Ruhago ribiteganya ntabwo umukinnyi udafite ibyangombwa byuzuye yari yemerewe gukina irushanwa yateguye.
Aya mabwiriza yahise agonga Madjaliwa wasabwe kuba aretse gukina uyu mukino ibye bikabanza bigasobanuka. Mu kiganiro cy’imikino kuri Fine FM, cyagarutse kuri uyu mukinnyi bagaragaje ko uyu mukinnyi yabeshye Rayon Sports ku byangombwa yayihaye.
Uyu mukinnyi w’imyaka 23 yageze muri Bumamuru FC nk’intizanyo avuye muri AS Dauphins Noirs yo muri Repubulika Iharanira Demokarasi ya Congo. Umwaka ushize igihe yatijwe cyari cyaramaze kurangira atangira kuvugana na Rayon Sports.
Nubwo yavuganye na yo ariko ibiganiro ntabwo byamenyeshejwe AS Dauphins Noirs nk’ikipe igifitanye amasezerano n’umukinnyi ahubwo ubwumvikane buba hagati y’umukinnyi na Murera.
Mu kiganiro Perezida wa Rayon Sports, Uwayezu Jean Fidèle, yahaye itangazamakuru nyuma y’umukino wa Super Cup yemeye ko “hajemo ibibazo mu masezerano ya Madjaliwa ariko ni ibintu bigiye gukurikiranwa.”
Umukinnyi yamaze kwemerera ikipe ko ibyakozwe bitanyuze mu mucyo ariko bishoboka ko yagurwa muri AS Dauphins Noirs igomba kugabanya amafaranga yamwifuzagamo.
Rayon Sports irateganya kwakira rutahizamu mushya, Eid Mugadam Abakar Mugadam, uturutse muri Al-Hilal yo muri Sudani.