Ikipe ya Arsenal ikina shampiyona yo mu Bwongereza (English Premier League), yatandukanye na George Lewis Ishimwe wari uyimazemo Imyaka 3.
Lewis Ishimwe w’Imyaka 23 y’amavuko, yakinaga muri iyi kipe guhera mu Mpeshyi y’i 2020.
Yayerekejemo avuye muri Fram Larvik yo mu gihugu cya Noruveje (Norway). Nyuma yo kugera muri Arsenal, yashyizwe mu ikipe yayo ikina mu kiciro cya kabiri.
Arekuwe nyuma yo kudahirwa muri iyi kipe, kuko iyi Myaka 3 yari ayimazemo yaranzwe no kugira imvune za hato na hato, n’ubwo yari yaguzwe nk’umukinnyi utanga ikizere.
Ishimwe wavukiye i Kigali, yerekeje mu gihugu cya Norway ku Myaka 4 gusa y’amavuko.
Yakiniye amakipe arimo; Tromso, Tromsdalen na Fram Larvik mbere y’uko abashinzwe kugurira abakinnyi Arsenal FC bamukubita ijisho.
Kugeza ubu n’ubwo yemerewe na FIFA kuba yakinira ikipe y’Igihugu y’u Rwanda (Amavubi) n’iya Norway nta gihugu na kimwe arakinira.