Igipimo cy’abapfa ku bushake babifashijwemo n’abaganga – ibizwi nka euthanasia – cyarazamutse muri Canada mu myaka itanu ishize, nubwo ubu kirimo kugenda buhoro muri rusange.
Iki gihugu cyasohoye raporo ya gatanu isohoka buri mwaka kuva cyakwemeza ubu buryo bwo gufasha ubishaka gupfa mu 2016, aho ku nshuro ya mbere yerekana n’ubwoko bw’abantu bakorerwa ‘Euthanasia’.
Abasaga 15,300 bahawe urupfu ku bushake bwabo mu mwaka ushize, abo bangana na 4.7% by’abapfuye bose mu gihugu.
Abatora amategeko muri Canada barashaka kwagura abahabwa ‘euthanasia’ bikagera no ku bantu bafite uburwayi bwo mu mutwe guhera nibura mu 2027.
Canada iri mu bihugu bicye ku isi byemeje ubu buryo bwo gufasha ubishaka gupfa mu myaka icumi ishize. Ibindi birimo Australia, New Zealand, Espagne na Autriche.
Imibare yatangajwe ku wa gatatu n’ikigo Health Canada yerekana ko igipimo cyo gufashwa gupfa muri Canada cyageze hafi kuri 16% muri 2023.
Uyu mubare waragabanutse cyane ugereranyije n’igipimo rusange cyo kwiyongera cya 31% cyo mu myaka yabanje.
Iyi raporo iburira ko hakiri kare gusobanura impamvu y’uku kumanuka kw’imibare mu mwaka ushize.
Benshi mu basabye gufashwa gupfa – hafi 96% – byari biteganyijwe ko bashobora gupfa urupfu rusanzwe.
Naho 4% basigaye bahawe ‘euthanasia’ kubera indwara karande kandi urupfu rusanzwe ntabwo rwari hafi kuri bo.
Ikigereranyo rusange cy’imyaka y’abasabye gufashwa gupfa ni 77, kanseri ni yo ndwara yiganje mu mpamvu zabateye gusaba kurangiza ubuzima bwabo mbere.
Ku nshuro ya mbere, raporo yatanzwe yagaragaje ubwoko bw’abasabye ‘euthanasia’. Aho 96% by’abayihawe ari abazungu, basanzwe bagize 70% by’abaturage ba Canada. Ntibizwi neza impamvu ari bo benshi babisaba.
Ubwoko bwa kabiri mu gusaba no guhabwa urupfu ni abakomoka mu burasirazuba bwa Aziya (1.8%), aba basanzwe bagize 5.7% by’abatuye Canada.
Gufashwa gupfa bikomeje kwiyongera muri Leta ya Quebec, aho ‘euthanasia’ yihariye hafi 37% by’imfu, nubwo iyi ntara ituwe na 22% gusa by’abaturage ba Canada.
Mu ntangiriro z’uyu mwaka Leta ya Quebec yatangije inyigo yo kumenya impamvu imibare y’abasaba kurangiza ubuzima bwabo iri hejuru.
Nubwo imibare y’abasaba gupfa muri Canada izamuka, iracyari inyuma yo mu Buholandi aho ‘euthanasia’ yihariye 5% y’imfu zose muri icyo gihugu mu mwaka ushize.
Canada yabanje kwemerera ‘euthanasia’ ku bantu biboneka ko “urupfu rubugarije” mu 2021 baguye itegeko bayemerera n’abantu bishoboka ko batarembejwe n’uburwayi, ariko bashaka kurangiza ubuzima bwabo kubera indwara idakira kandi imugaza.
Muri uyu mwaka byari byitezwe ko bazagura bakemerera n’abafite uburwayi bwo mu mutwe ariko byarakererejwe kubera impungenge zatanzwe na zimwe mu ntara zigize Canada.
Kwemerera abantu kurangiza ubuzima bwabo kubera impamvu zitandukanye ahanini zishingiye ku magara yabo birimo kuganirwaho mu bihugu nk’Ubwongereza, Ecosse, Ubutaliyani, Ubudage na Portugal.
Muri Leta Zunze Ubumwe za Amerika leta zigera ku munani umunani zirimo California, Washington na Oregon, Maine na Colorado zemeje ‘euthanasia’, muri Amerika y’Epfo Colombia na Ecuador ni byo bihugu byemera ubu buryo.
Muri Afurika iyi ngingo nta ho iremezwa nta n’aho iganirwaho mu bashinga amategeko, mu gihe igihugu cya mbere ku isi cyemeje gufasha abantu gupfa ku bushake ari Ubusuwisi bwabikoze mu 1942. (BBC)
