“Amakuru y’isubikwa ry’Umukino dufitanye na Al Hilal Benghazi ntayo dufite” – Umunyamabanga wa Rayon Sports


image_pdfimage_print

Umunyamabanga w’ikipe ya Rayon Sports FC, Namenye Patrick yatangaje ko amakuru y’isubikwa ry’umukino ubanza wa CAF Confederations Cup iyi kipe ifitanye na Al Hilal Benghazi kugeza ubu ntayo bafite.

Kugeza ubu, biteganyijwe ko umukino uzahuza amakipe yombi uzaba kuri uyu wa Gatanu tariki ya 15 Nzeri 2023, ukubera kuri Sitade y’Abahowe Imana i Benina.

Amakuru y’isubikwa ry’uyu mukino, yatangiye kujya hanze nyuma y’uko muri Libya yabaye Imyuzure imaze guhitana abasaga 5000, mu gihe 10,000 byaburiwe irengero.

Namenye uri kumwe n’ikipe ya Rayon Sports yerekeje muri Libya gukina uyu mukino, yatangaje ibi kandi mu gihe hari amakuru ko Al Hilal Benghazi yaba yarasabye CAF gusubika uyu mukino, mu rwego rwo kunamira abahitanywe n’iyi Nkubi y’Umuyaga yiswe Daniel.

N’ubwo aya makuru y’isubikwa ry’uyu mukino akomeje kuvugwa, ku ruhande rwa Rayon Sports, Namenye yatangaje ko icyo CAF yababwiye ari uko bazafata Umunota wo kwibuka abahitanywe n’iyi Nkubi y’Umuyaga, ariko ibijyanye n’isubikwa ry’uyu mukino ntacyo babivuganyeho.

Ati: Kugeza ubu nta Baruwa (Urwandiko) turabona ruvuye muri CAF ruvuga ibyo gusubika uyu mukino. Icyo tuzi kugeza ubu ni uko twasabwe kuzafata Umunota wo kwibuka ababuriye ubuzima muri ibi Biza.

Amakuru yizewe THEUPDATE ifite, ni uko kuri uyu wa Kane tariki ya 14 Nzeri 2023, hateganyijwe ibiganiro bizahuza amakipe yombere y’umukino, ibi bikazabera kuri Hotel Berenice Tourist saa 11:00 ku Isaha ya Kigali.

Ibikesheje kwitwara neza ubwo iheruka muri aya Marushanwa mu 2018, Rayon Sports ntago yakinnye imikino y’ijonjora rya mbere, mu gihe Al Hilal Benghazi byayisabye gusezerera Homeboyz FC yo muri Kenya ku ntsinzi y’ibitego 4-1 mu mikino yombi.


Leave a Reply

Your email address will not be published. Required fields are marked *