Rwanda: Minisitiri Gatabazi yongeye kugaragara abyina Ikinimba, bishimisha abatari bake

Kuri uyu wa Gatanu tariki ya 29 Mata 2022, Minisitiri w’Ubutegetsi bw’Igihugu, Bwana Gatabazi Jean Marie Vianney yongeye gushimirwa uburyo asabana no kwicisha bugufi bimuranga, nyuma yo kugaragara abyinana Ikinimba n’Intore.

Minisitiri Gatabazi yabyinnye iyi Mbyino ubwo yari yitabiriye Umusangiro wahuje Ibihugu binyuranye birimo u Rwanda, Zimbabwe, Eswatini na Repubulika ya Centre Africa.

Uyu Muhango wabaye kuri uyu wa 27 Mata 2022, ubwo Ikigo gishinzwe kumenyekanisha Udushya n’ibisubizo u Rwanda rwishatsemo (Rwanda Cooperation) cyakiraga Amatsinda yatutse muri ibi bihugu.

Aya Matsinda anyuranye yaturutse muri Zimbabwe, Eswatini na Repubulika ya Centre Africa, yaje mu Rwanda mu Rugendoshuri rwo kwiga ku ngingo zinyuranye zirimo gahunda zigamije gufasha abatishoboye ndetse n’Uburinganire n’Ubwuzuzanye bw’Abagore n’Abagabo.

Mu Mashusho n’Amafoto dukesha Ikigo gishinzwe kumenyekanisha Udushya n’Ibisubizo u Rwanda rwishatsemo (Rwanda Cooperation), agaragaza Minisitiri Gatabazi ari mu gikorwa cyo gutarama aho aba Abyinana n’Intore imbyino y’Ikinimba.

Aya Mashusho yongeye gutuma Minisitiri Gatabazi ashimirwa uburyo yicisha bugufi ndetse n’uko asabana n’abaturage.

Uwitwa Muhoza Jean d’Amour, agaruka kuri aya Mashusho yagize ati:“Ubusabane, Umurava, kwicisha bugufi ugira, Hon. Minisitiri Gatabazi Jean Marie Vianney turabigukundira. Uzadusure i Gatsibo dusabane twizihirwe, tukwereke n’Umuco w’Iwacu (Igishakamba dance).”

Naho uwitwa Pamela Mudakikwa we yagize ati:“Ubwiza bw’Imbyino Gakondo yacu ukongera Ibyishimo bya Minisitiri wacu.”

Minisitiri Gatabazi, akunze kugaragara yisanzuye haba mu baturage aba yasuye aho yifatanya na bo mu Bikorwa binyuranye byaba ari Umuganda ndetse n’ibi byo Kwidagadura birimo Kubyina.