2a397cc0a352b1342e4b529dfc5c5d5f

Rwanda: Minisitiri Gatabazi yasabye abahoze mu Mitwe y’Abarwanyi kudaheranwa n’igihe batakaje

Minisitiri w’Ubutegetsi bw’Igihugu, Gatabazi Jean Marie Vianney yasabye abantu 735 bari abarwanyi mu mitwe yitwaje intwaro n’abasivili kudaheranwa n’igihe bataye, ahubwo bafatire ku mahirwe bahabwa n’igihugu biteze imbere.

Yabitangarije mu Kigo cya Mutobo giherereye mu Karere ka Musanze, ahashojwe icyiciro cya 67 kigizwe n’abantu 735 bari abarwanyi mu mitwe yitwaje intwaro n’abasivili bakoranaga nabo bakuwe mu mashyamba yo muri Repubulika Iharanira Demokarasi ya Kongo.

Biyemeje gufatanya n’abandi kubaka igihugu basaba abakiri muri aya mashyamba gutahuka mu rwababyaye.

Mu myaka ikabakaba ibiri n’igice bari bamaze muri iki kigo cya Mutobo, aba barangije baganirijwe n’inzego zitandukanye z’igihugu ku burere mboneragihugu banahigira imyuga itandukanye igomba kubafasha mu buzima busanzwe.

Ni ibikorwa byishimiwe cyane n’aba basezerewe bagahamya ko bigiye kubafasha mu buzima bagiye kubanamo n’abandi banyarwanda.

Aba basezerewe bavuga ko nyuma yo kwibera abahamya b’ibyo igihugu cyagezeho ngo nta soni na mba bafite zo kubwira abakiri mu mashyamba ko ibyo barimo ari uguta igihe.

Umuyobozi wa Komisiyo y’Igihugu ishinzwe gusezerera no gusubiza mu buzima busanzwe abari abasirikare, Nyirahabineza Valery avuga iki cyiciro cyabaye ikidasanzwe kuko abakigize birukanywe ku ngufu mu gihugu cya Kongo bashyikirizwa u Rwanda.

Nubwo bimeze gutya ariko uyu muyobozi avuga ko bahawe impanuro zihagije bityo asaba buri wese kutabikanga.

Minisitiri Gatabazi we avuga ko washoje ibikorwa by’iki cyiciro, yasabye abasezerewe kudaheranwa n’igihe bataye ngo ahubwo bafatire ku mahirwe bahabwa n’igihugu biteze imbere.

Abandi banyarwanda na bo basabwe na Ministre Gatabazi kubakira neza.

Kuva mu mwaka wa 2001 kugeza magingo aya, Ikigo cya Mutobo kimaze kunyurwamo n’aba bavuye mu mitwe yitwaje intwaro ibihumbi 12.274.


Comment As:

Comment (0)