rsz1cd099e

Kwibuka28: Imbamutima z’Abarokotse Jenoside yakorewe Abatutsi bafashijwe n’Umurinzi w’Igihango i Huye

Hari abarokotse Jenoside yakorewe Abatutsi  bo mu Karere ka Huye, bavuga ko hashingiwe ku Butwari bw’Umurinzi w’Igihango witwa Dufitumukiza Anaclet wagize uruhare rukomeye mu kubarokora, abakiri bato bafite Umukoro wo kwigira kuri izi Ndangagaciro z’Ubumuntu n’Ubupfura kugira ngo u Rwanda rw’ahazaza ruzarusheho kuba rwiza.

Dufitumukiza Anaclet yari umujandarume atwara imodoka mu cyahoze ari perefegitura ya Butare, na mbere yaho gato ariko ngo Abatutsi batangiye batotezwa areba, kugera ubwo habaye jenoside ariko we yiyemeje kwitandukanya n’abakoraga ubwicanyi kuko ngo yakuze yanga karengane.

Mu bihe bya jenoside yakorewe Abatutsi, Dufitumukiza Anaclet ngo yakoreshaga imodoka y’akazi mu guhungisha Abatutsi bahigwaga abajyana ku Kanyaru bakambuka bakajya mu Burundi, abandi akabafashiriza aho babaga bihishe mu gihe abana bo yabajyanaga mu kigo cya Croix Rouge cyabaga ku Itaba mu Murenge wa Ngoma.

Ibi bikorwa yakoraga ngo yari abizi neza ko yashoboraga kubizira.

Nyuma gato y’uko ingabo zahoze ari iza RPA zihagarikiye jenoside, Dufitumukiza Anaclet ngo yaje kwinjira mu gisirikare ariko nyuma ahagana mu 2000 aza kukivamo ajya mu kandi kazi. 

Kuri ubu Dufitumukiza Anaclet yagizwe umurinzi w’igihango wo ku rwego rw’igihugu, ndetse bamwe mu bo yafashije kurokoka no kurokora imiryango yabo barimo Mukarushema Annonciata na Mukamazimpaka Adela bavuga ko Dufitumukiza Anaclet ari umuntu udasanzwe mu buzima bwabo.

Mukarushema Annonciata kuri ubu afite imyaka 57 naho Mukamazimpaka Adela we ageze ku myaka 68, aba bombi bavuga ko ibikorwa by’ubutwari no kwanga umugayo byaranze Dufitumukiza Anaclet cyane cyane ubwo yitandukanyaga n’abakoraga jenoside ahubwo agahitamo kubafasha bikwiriye kuba umurage mwiza ku Rwanda rw’ubu n’ahazaza.

Ubwo yagirwaga umurinzi w’igihango wo ku rwego rw’igihugu umwaka ushize, Umuryango Unity Club Intwararumuri wagize uti  “Dufitumukiza Anaclet mu gihe cya Jenoside yakorewe Abatutsi yaranzwe n’urukundo, ubunyangamugayo n’ubudahemuka, yitandukanya n’ibikorwa byo kwica Abatutsi ahubwo arabatabara abafasha guhunga, abandi arabahungisha.”

Iki gihe Perezida wa Repubulika wari witabiriye uyu muhango, yavuze ko nta muntu wibereyeho ahubwo buri wese ariho ngo abereho undi.

Dufitumukiza Anaclet kuri ubu atuye mu Murenge wa Tumba mu mudugudu wa Kigarama, ni umugabo w’imyaka 59 wubakanye na Mukankusi Liliane akaba afite abana 7.

Ni umushoferi mu muryango ushamikiye kuri diocese gaturika witwa Igiti cy'Ubugingo. [RBA]



Comment As:

Comment (0)