FB_IMG_1649356185413

Rwamagana: Ubwo hatangizwaga iminsi 100 yo Kwibuka abazize Jenoside yakorewe Abatutsi, Meya Mbonyumuvunyi yihanganishije ababuriye ababo mu Murenge wa Gishari bashyinguye mu Rwibutso rwa Ruhunda

Ku rwego rw'Akarere ka Rwamagana, Icyumweru cy’Icyunamo n’Iminsi 100 yo Kwibuka ku nshuro ya 28 Jenoside yakorewe Abatutsi mu Mwaka w'i 1994, cyaraye gitangirijwe mu Murenge wa Gishari, ku Rwibutso rwa Ruhunda.

Uretse Ibiganiro byabereye muri buri mudugudu. Ku rwego rw’aka Karere, ibikorwa byo Kwibuka ku nshuro ya 28 Jenoside yakorewe Abatutsi, cyabereye mu Busitani bw’Urwibutso rwa Ruhunda, Urwibutso rushyinguyemo Imibiri 5,081.

Ni Igikorwa cyitabiriwe na Badepite Nyiragwaneza Athanasie na Depite Uwineza Belline bari hamwe n’abagize Inama Njyanama y’aka  Karere, Komite nyobozi y’Akarere, abahagarariye Inzego z’Umutekano, abahagarariye IBUKA, abahagarariye Ibigo bya Leta bikorera muri aka  Karere, Imiryango y’Abarokotse by'umwihariko Abarokokeye muri uyu Murenge ndetse n’Abaturage muri rusange.

Mu ijambo ritangiza uyu Muhango, Meya Mbonyumuvunyi Radjab yavuze ko ku itariki nk’iyi mu Rwanda hose no ku Isi, Abanyarwanda aho bari hose n’inshuti zabo bafatanyiriza hamwe Kwibuka Abanyarwanda b’Inzirakarengane bazize Jenoside yakorewe Abatutsi mu Mwaka w'i 1994.

Bityo muri iyi Minsi 100 hakaba hazakorwa Ibikorwa bitandukanye byo kubazirikana no kubasubiza Icyubahiro.

Bwana Mbonyumuvunyi yakomeje avuga ko Umurenge wa Gishari ufite Amateka y’ihariye yo mu gihe cya Jenoside yakorewe Abatutsi, kuko ubuhamya bw’Abaharokokeye bugaragaza ko Jenoside yahakoranywe Ubugome ndengakamere. Yasoje iri jambo yihanganisha Abarokotse.

 

Muri uyu Muhango, Perezidante wa IBUKA mu Karere ka Rwamagana Madamu Musabyeyezu Dative yasabye ko buri wese yiha intego ishingiye ku nsanganyamatsiko nkuru ariyo “Kwibuka Twiyubaka”, bityo hakabaho kwiyubaka kandi hubakwa n'abandi muri rusange.

Madamu Musabyeyezu Dative,  yaboneyeho gushimira Leta y’ubumwe ikomeje gufasha Abarokotse Jenoside kongera kwiyubaka, bityo uyu munsi bakaba bakomeje kwinjirana n’abandi Banyarwanda mu ruhando rw’Iterambere.

Yashimiye kandi Inkotanyi zanze kurebera, ahubwo zigahaguruka zigahagarika Jenoside. Yaboneyeho gusaba abaturage kwigira ku Butwari bw’Inkotanyi nabo bakajya baharanira kurwanya ikibi aho cyaturuka hose.

 

Hon. Depite Uwineza Beline wari Umushyitsi mukuru muri uyu Muhango, mu ijambo ryr yakomeje Abarokotse, avuga ko bitaba byoroshye kuko muri iki gihe haba hagombwa gufata umwanya hakibukwa Amateka ashaririye Igihugu cyanyuzemo, ndetse abantu bakarushaho Kwibuka biyubaka, banaharanira kubaka u Rwanda rwifuzwa.

Hon. Uwineza Beline yongeyeho ko muri iyi minsi 100 Hibukwa Inzirakarengane z’Abatutsi barenga 1,000,000 bishwe muri Jenoside, Umuhango ukorwa buri Mwaka mu rwego rwo gukomeza Umuhigo w'uko ibyabaye mu gihugu bitazongera ukundi.

Yavuze kandi ko kugira ngo bitazongera ukundi ari uko, aya Mateka atagomba gusibangana, ndetse ko kugira ngo adasibangana ari uko yakomeza guhererekanywa uko Ibisekuru bizajya bisimburana.

Igihe twibuka Jenoside yakorewe Abatutsi mu 1994, tuzirikana Abatutsi bishwe, tukareba impamvu zatumye ibaho harimo n’ubuyobozi bubi bwavangurana abana b’u Rwanda, tukibuka uko abaturage bashowe muri Jenoside kugeza aho umuntu yica Umuturanyi bari barahanye Igihango,… ariyo mpamvu Abanyarwanda bahisemo kuba umwe kuko bazi ingaruka z’Amacakubiri.

Muri iyi Minsi 100 yo Kwibuka, tuzirikana n’amasomo twakuyemo harimo isomo ry’Ubutwari bwaranze Inkotanyi zari zirangajwe na Perezida Paul Kagame, isomo ry’Ubudaheranwa kuko nyuma y’ibyo u Rwanda rwanyuzemo rwiyemeje kongera kubaho, n’Isomo ry’ubuyobozi bwiza buharanira ubumwe bw’Abanyarwanda.

Yasabye Abaturage kurushaho gukorera hamwe mu guhangana n’Ingengabitekerezo ya Jenoside aho yaturuka hose, guhangana n’Abayipfobya aho bari hose no kwirinda Amacakubiri.

Image

Depite Beline Uwineza yasabye abaturage kurushaho gukorera hamwe mu guhangana n’ingengabitekerezo ya Jenoside aho yaturuka hose

 

Image

Image

Image

Image

Image

Image

Image

Image

Image


Comment As:

Comment (0)