20220407_143746

Kirehe: Kwibuka Jenoside yakorewe Abatutsi ku nshuro ya 28 byatangirijwe ku Rwibutso rwa Nyakarambi, Meya Rangira afata mu Mugongo Abarokotse

Umuyobozi w'Akarere ka Kirehe Bwana Bruno Rangira, yihanganishije abafite ababo bashyinguye mu Rwibutso rwa Jenoside yakorewe Abatutsi rwa Nyakarambi, anaboneraho kwibutsa abitabiriye uyu Muhango kuzakurikirana no kuzitabira ibikorwa byateguwe muri iki Cyumweru ndetse n'Iminsi 100.

Ibi Bwana Rangira yabigarutseho mu gihe kuri uyu wa 07 Mata 2022, u Rwanda n'Isi muri rusange bibuka ku nshuro ya 28 Jenoside yakorewe Abatutsi mu Rwanda muri Mata mu 1994.

Nk'uko byagenze n'ahandi hose mu Turere 30 tugize Igihugu, no mu Karere ka Kirehe habereye igikorwa cyo Kwibuka Inzirakarengane z'Abatutsi zishwe mu gihe cya Jenoside yabakorewe mu Mwaka w'i 1994.

Ku rwego rw'aka Karere, uyu Muhango wabereye ku Rwibutso rwa Nyakarambi, ahashyizwe Indabo ku Mva zishyinguyemo Imibiri isaga 9658.

Ni Umuhango wari witabiriwe na Komite nyobozi y'Akarere yari irangajwe imbere na  Bwana Bruno Rangira, Perezida wa Njyanama Kabera Callixte, Visi Perezida Mukaneza Pelagie, inzego z'Umutekano ndetse n'Abacitse ku Icumu.

Mu ijambo Bwana Bruno Rangira yagejeje ku bari bitabiriye uyu Muhango, yagize ati:"Uyu Munsi twibuka ku nshuro ya 28 Jenoside yakorewe Abatutsi muri Mata 1994, mbanje kubaramutsa no kubahumuriza. Twibuke twiyubaka, bityo bidufashe kwirinda guheranwa n’agahinda" 

Yakomeje agira ati "Twifatanyije n’Ababuze ababo mu gihe cya Jenoside yakorewe Abatutsi muri Mata 1994, by’umwihariko abafite ababo bashyinguye muri uru Rwibutso rwa Nyakarambi. Ni muhumure twifatanyije namwe muri ibi bihe by’Icyunamo cyo kubura abanyu (Ababyeyi, Abavandimwe n'Inshuti...)" 

"Turashimira Leta yacu ko idukunda, yumva ubusabe bwacu. Yadufashije kubaka uru Rwibutso rushya, Urwibutso rugiye kuzadufasha Gushyingura mu Cyubahiro Imibiri y’Abacu bazize Jenoside yakorewe Abatutsi muri Mata mu 1994, Gushyingura iyi Mibiri bikazakorwa muri iyi minsi yo 100 yo kwibuka".

"Ntiwakwibagirwa kandi gushimira Ingabo zari iza RPA-RPF Inkotanyi, zemeye kwitanga zigahagarika Jenoside, ubu tukaba ducana Urumuri rw’Icyizere tuvuga tuti (Twibuke Twiyubaka, ndetse n'ibyabaye ntibizongere kuba ukundi) “Never again”.

"Ndabasaba kuzajya mwitabira no gukurikirana Ibiganiro ndetse n'ibikorwa byateguwe muri iki Cyumweru cy'Icyunamo, birimo Ibikorwa by’Amaboko n’ubundi bufasha bugamije gufata mu Mugongo Abarokotse Jenoside yakorewe Abatutsi muri Mata mu 1994".

Bwana Nduwimana Bonaventure ukuriye Ibuka mu Karere ka Kirehe, mu Ijambo rye 
yavuze ko Abacitse ku Icumu bashimira ubuyobozi bw'Igihugu kuba byarabafashije bakaba bameze neza kuri ubu.

Ati:"Ubuyobozi bwiza bwatugaruriye Ubuzima, nyuma yo guhura n'Akaga mu gihe cya Jenoside yakorewe Abatutsi mu 1994. Nshingiye kuri ibi, mboneye gusaba Abarokotse by'umwihariko, Kwibuka twiyubaka ndetse no guharanira Iterambere".

Umuyobozi wa Njyanama y'aka Karere Bwana, Kabera Callixte, yashimiye abitabiriye uyu Muhango wo Kwibuka Jenoside yakorewe Abatutsi ku nshuro ya 28, abasaba gukomeza kurwanya Ingengabitekerezo ya Jenoside.

Mu ijambo kandi yashimiye Ingabo za RPA-FPR Inkotanyi zahagaritse Jenoside yakorewe Abatutsi, ndetse n'ubuyobozi bw'Igihugu burangajwe imbere na Perezida wa Repubulika Nyakubahwa Paul Kagame.

 

Image

Bwana Bruno Rangira, umuyobozi w'Akarere ka Kirehe

 

Image

Perezida wa Njyanama y'Akarere ka Kirehe Bwana, Kabera Callixte

 

Image

Bwana Nduwimana Bonaventure ukuriye Ibuka mu Karere ka Kirehe.

 

Image

Image

Image

Image

Image

Image

Image

Image

Image

Image

Image

 

 


Comment As:

Comment (0)