Hirya no hino: Ubumwe bw’Ubulayi burimbanyije Ibiganiro bigamije kwinjiza Ukraine muri uyu Muryango

Komite nyobozi y'Umuryango w'Ibihugu by’Ubumwe bw'Uburayi, izatangaza aho ihagaze mu Kwezi kwa Gatandatu, ku byasabwe n'Igihugu cya Ukraine ku bijyanye no kwinjira muri uyu Muryango.

Iki kemezo, kitezwe kuzaba ari Intambwe ikomeye cyane mbere y’uko ubu busabe busuzumwa n’Ibihugu bigize Umuryango w’Ubumwe bw’Uburayi.

Umuyobozi wa Komite nyobozi y’Umuryango w’Ubumwe bw’Uburayi, Madamu Ursula von der Leyen, yemeje ibi abinyujije ku Rubuga rwe rwa Twitter kuri uyu wa Mbere.

Mu Kwezi kwa Kane gushize, Ursula von der Leyen, yasuye Igihugu cya Ukraine, Urugendo avuga ko rwari rugamije kwerekana ko yifatanyije n’iki gihugu mu Ntambara igihanganishije n’Uburusiya.

Yemeye ko Umuryango w’Ubumwe bw’Uburayi uziga ku busabe bumaze igihe wa Ukraine bwo kwinjira muri uyu Muryango.

Kwemeza bidasubirwaho ko Ukraine yakiriwe, bizafatwaho umwanzuro n’Ibihugu 27 byose bigize uyu Muryango kuri ubu, ibi bikazaba kandi bishingiye ku bizaba byatanzwe na Komite nyobozi y’uyu Muryango.

Mbere yo kwemezwa, Ukraine izasabwa kubanza kubahiriza ibisabwa ku bijyanye n’ubuyobozi Bwiza, kurwanya Ruswa no kubahiriza Amategeko, mbere y’uko yemererwa burundu ko yakiriwe mu Muryango w’Ibihugu by’Uburayi. (AFP)

Perezida wa Ukraine na Ursula von der Leyen wa EU.